Vra vir Faffa

Skaap het probleme om te sluk

Vraag

Ons het 'n Dorperooi wat vreeslik slym en skuim spoeg en dit lyk of sy nie voedsel kan sluk nie. Hoe kan ons vasstel wat die oorsaak is?

Antwoord

Skape wat “kwyl” kwel my beslis!

Die eerste ding waaraan ek dink, is hondsdolheid en in so ‘n geval wil ek nie graag aan haar “krap” nie!
Dan het ek  ook al skuim en spoegloop gesien by lamsiekte waar die dier nie kan sluk nie – word veroorsaak deur “pika” – ‘n toestand waar diere (veral beeste, maar ook skape) aan bene of “karkasse” soos skilpaddoppe vreet. Ook waar mense hoendermis in lekke of voer sit.
Dan dink ons uiteraard aan “Vermeersiekte” waar skape die bossie (Geigeria) vreet – jy noem ongelukkig nie waar julle boer nie en ek lei ook af dat dit net een ooi is wat simptome wys. Verwys gerus na ‘n vorige artikel hieroor op Vra vir Faffa.
Dan het ek ‘n vriend wat sy skape in ‘n aartappelland ingejaag het en gekry het dat ‘n artappel in die keel vassit – indien dit gebeur, kan enige “iets” van daardie grootte mos in die keel vassit!
En dan kan tandprobleme – ‘n slegte tand, los tande, tande wat onegalig afslyt, skape wat wissel – ook lei tot “kwyl” simptome. Ook hieroor is daar al voorheen op die webwerf geskryf.
Wees dus maar versigtig – hondsdolheid maak mense dood! Ek sal so ‘n geval dan eerder veerts toe vat – hy kan die dier deeglik ondersoek en selfs ‘n maagbuis in die keel afdruk om ‘n “verstopping” los te kry.
Geskryf deur: dr. Dave Midgley, Veeartskonsultant (dave.midgley@vodamail.co.za)
3 Augustus 2011
Lees ook:

Lamsiekte
Spons- en lamsiekte in dragtige skape
Onbekende vrektes by skape
Hoendermis as veevoer


Tande
Pensmis in skaap se mond

Vermeerbos
Pensmis in skaap se mond
Leer vee neus optrek vir gif


Lewer Kommentaar

Slegs in Afrikaans

Los 'n antwoord

Alle velde moet ingevul word.